“O‘zagrosug‘urta” AJ va Tashqi mehnat migratsiyasi agentligi o‘rtasida hamkorlik bitimi imzolandi
Davlatimiz rahbarining “Inson qadri uchun” g‘oyasi, bu avvalo, har bir fuqaroning tinch va xavfsiz hayot kechirishini, uning fundamental huquq va erkinliklarini ta’minlash demakdir. Ushbu g‘oyani amalda ro‘yobini ta’minlash bo‘yicha barcha imkoniyatlar ishga solinmoqda.
Ma’lumki, keyingi yillarda mamlakatimizda tashqi mehnat migratsiyasi jarayonlarini tartibga solish, vaqtinchalik mehnat faoliyatini amalga oshirish uchun xorijga jo‘nab ketayotgan fuqarolarning huquq va manfaatlari himoya qilinishini ta’minlash, ularga zarur huquqiy, ijtimoiy, axborot-maslahat yordami ko‘rsatish va moddiy qo‘llab-quvvatlash yuzasidan amaliy choralar ko‘rilmoqda. Bu xorijda mehnat qilish uchun ketayotgan har bir fuqaroning hayot darajasini oshirishga qaratilgan ijtimoiy muhofaza kuchayib borayotganini anglatadi.
Mamlakatimiz Prezidentining 2019 yil 20 avgustdagi “Xorijda vaqtinchalik mehnat faoliyatini amalga oshirayotgan O‘zbekiston Respublikasi fuqarolari va ularning oila a’zolarini himoya qilish kafolatlarini yanada kuchaytirish choralari to‘g‘risida”gi farmoni bu borada amalga oshirilayotgan islohotlarni huquqiy jihatdan mustahkamlab berdi. Farmonga ko‘ra, yiliga bir marotaba xorijda vaqtinchalik mehnat faoliyatini amalga oshirish davrida fuqarolar hayoti va sog‘lig‘ini hamda boshqa tavakkalchiliklarni sug‘urtalash bo‘yicha sug‘urta mukofoti summasini qoplash uchun sug‘urtalangan har bir mehnat migranti uchun 50 ming so‘m miqdorida bir martalik subsidiyalar taqdim etish amaliyoti joriy etildi.
Mazkur farmon ijrosini ta’minlash maqsadida “O‘zagrosug‘urta” AJ hamda O‘zbekiston Respublikasi Tashqi mehnat migratsiyasi agentligi o‘rtasida o‘zaro hamkorlik qilish bo‘yicha kelishuv bitimi imzolandi.
Mazkur bitim xorijga vaqtincha mehnat faoliyatini amalga oshirish uchun ketayotgan O‘zbekiston Respublikasi fuqarolarini kompleks sug‘urta qilish va ijtimoiy qo‘llab-quvvatlash, shu jumladan bir martalik subsidiyalar yuzasidan sug‘urtalash ishlari qamrovini kengaytirishni nazarda tutadi. Hujjatda har ikkala tomonlarning vazifalari aniq qilib belgilab qo‘yildi. Xususan, xorijda mehnat faoliyatini amalga oshirish istagidagi fuqarolarimizni kompleks sug‘urtalash, ularga sug‘urtaning mohiyati, afzallik jihatlari to‘g‘risida tushuntirish ishlarini olib borish va ularni sug‘urtaviy himoyaga olish bo‘yicha hamkorlikda sharoit yaratib berish ko‘zda tutilgan.
Eng muhimi, ushbu sug‘urta polisi fuqarolarimizga atigi 3-5 daqiqa ichida elektron tarzda bepul rasmiylashtiriladi. Polis doirasida 10 ming yevro miqdorida javobgarlik olib boriladi. Bundan tashqari, mazkur sug‘urta polisi yurtdoshlarimizga xorijda baxtsiz hodisa tufayli tibbiy yordam olishi, repotratsiya va hatto, ishlash uchun patent ololmay Vatanga qaytadigan bo‘lsa, yo‘l kira harajatlarini qoplash imkoniyatini beradi.
Hamkorlik bitimining imzolanishi kelajakda xorijda vaqtinchalik mehnat faoliyatini amalga oshirayotgan vatandoshlarimizning ijtimoiy muhofazasini ta’minlashga xizmat qiladi.
Axborot xizmati