Ayollar jamiyat hayoti barcha sohalarining faol ishtirokchisi
Mamlakatimizda aholining qariyb 50 foizini xotin-qizlar tashkil etadi. Ularning barcha huquq va erkinliklari doim qonun himoyasida. O‘zbekiston Respublikasi Konstitutsiyasining 46-moddasida ham “Xotin-qizlar va erkaklar teng huquqlidirlar”, deb belgilab qo‘yilgan.
Ma’lumki, bugungi kunda ayollar ijtimoiy-ma’naviy, siyosiy-iqtisodiy hayotning barcha sohalarida samarali va faol mehnat qilib kelmoqda. Ularning ijtimoiy hayotdagi mavqeini kuchaytirish, siyosiy faolligini oshirish, davlat va jamiyat boshqaruvidagi ishtirokini kengaytirish, onalik va bolalik himoyasini ta’minlash yuzasidan qilinayotgan ishlar amaliy natijalarda namoyon bo‘lmoqda.
“O‘zagrosug‘urta” aktsiyadorlik jamiyati Boshqaruvi tomonidan O‘zbekiston Respublikasi Oila va xotin-qizlar davlat qo‘mitasi bilan hamkorlikda joriy yilning 8 avgust kuni gender tenglikni ta’minlash masalalari yuzasidan seminar tashkil etildi. Toshkent viloyatining Bo‘stonliq tumanidagi so‘lim go‘shalardan birida o‘tkazilgan tadbirda Jamiyat Boshqaruvida faoliyat yuritayotgan xotin-qizlar ishtirok etishdi.
Seminarda ta’kidlanganidek, so‘nggi yillarda mamlakatimizda ayollar huquqlari himoyasini tubdan kuchaytirishga qaratilgan amaliy choralar ko‘rildi. Xususan, bu boradagi islohotlarning huquqiy asoslariga e’tibor qaratilib, qator me’yoriy-huquqiy hujjatlar qabul qilindi. Ayniqsa, “Xotin-qizlar va erkaklar uchun teng huquq hamda imkoniyatlar kafolatlari to‘g‘risida”gi qonunda davlat xotin-qizlar va erkaklarga shaxsiy, siyosiy, iqtisodiy, ijtimoiy va madaniy huquqlarni amalga oshirish chog‘ida teng huquqlilikni, jamiyat hamda davlat ishlarini boshqarishda, saylov jarayonida teng ishtirok etishni kafolatlashi mustahkamlab qo‘yildi.
Oila va xotin-qizlar davlat qo‘mitasi Gender tenglikni ta’minlash va xotin-qizlarning ijtimoiy-siyosiy faolligini oshirish bo’limi bosh mutaxassisi Maxmudova Aziza Umarovna tenglik bo‘yicha institutsional asoslar kengaytirilgani ushbu masala davlat siyosati darajasiga ko‘tarilib, 2030 yilga qadar O‘zbekiston Respublikasida gender tengligiga erishish strategiyasi ishlab chiqilganini aytib o‘tdi. Davlat organlarida, nodavlat va xususiy tashkilotlarda, ayniqsa, qarorlar qabul qilish bilan bog‘liq yuqori lavozimlarda ayollarning teng vakilligini ta’minlash siyosatini takomillashtirish, jamoatchilik ongida erkaklar va ayollarning o‘rni haqidagi tushunchalarni o‘zgartirishga qaratilgan sa’y-harakatlarni amalga oshirish kabi masalalar kun tartibidan o‘rin oldi.
Ularning ijrosini so‘zsiz ta’minlash masalasi ham diqqat markazdagi masala ekani, buning uchun parlamentning yuqori palatasida Xotin-qizlar va gender tenglik masalalari qo‘mitasi, O‘zbekiston Respublikasining Gender tenglikni ta’minlash masalalari bo‘yicha komissiyasi, Xotin-qizlar va erkaklar uchun teng huquq hamda imkoniyatlarni ta’minlash masalalari bo‘yicha Maslahat-kengashlari, shuningdek, Respublika xotin-qizlar jamoatchilik kengashi tashkil etilgani ta’kidlandi.
Ayni paytda amaliy ishlar qatorida qizlarning bilim olishi davlat nazoratida ekani, qizlarimiz tarbiyasi, ularni mustaqil hayotga tayyorlash, zamonaviy bilim va hunarlarni egallashi, ish joyiga ega bo‘lishi, jamiyatda munosib o‘rin topishi kabi masalalarga ustuvorlik berilmoqda. Davlatimiz rahbarining tashabbusi bilan yo‘lga qo‘yilgan tizimga muvofiq, 950 nafar ijtimoiy himoyaga muhtoj qiz ta’lim muassasalariga davlat granti asosida o‘qishga qabul qilindi. E’tiborlisi, bu ko‘rsatkichning yildan-yilga muntazam oshib borilishi qat’iy belgilangan.
Xususan, 2021/2022-o‘quv yilidan boshlab to‘lov-kontrakt asosida davlat oliy ta’lim muassasasiga qabul qilingan, ota-onasi yoki ularning biridan ayrilgan muhtoj qizlar, boquvchisi yo‘q yolg‘iz ayollarni hududiy hokimliklar hamda davlat oliy ta’lim muassasalari hisobidan o‘qitish tartibi joriy etildi.
Xorijning nufuzli ta’lim muassasalariga “El-yurt umidi” jamg‘armasi stipendiyalari asosida o‘qishga yuboriladigan stipendiatlar orasida xotin-qizlar ulushi kamida 20 foizga ko‘paytirildi. Qolaversa, boquvchisini yo‘qotgan ayollarga farzandini maktabgacha ta’lim tashkilotlari, shu jumladan, oilaviy bog‘chalarga berish xarajatlarini byudjetdan qoplash tizimi joriy etilmoqda.
Yana bir e’tiborli jihat, xotin-qizlarni har tomonlama qo‘llab-quvvatlash, sog‘lig‘ini saqlash, mehnat va o‘qish sharoitlarini yaxshilash, ularga mehnat bozorida talab yuqori bo‘lgan kasblar bo‘yicha bilim va ko‘nikmalarni egallashlari uchun zarur sharoitlar yaratish hamda og‘ir ijtimoiy vaziyatga tushib qolgan xotin-qizlarga, shu jumladan, nogironligi bo‘lgan shaxslarga maqsadli yordam berish maqsadida Xotin-qizlarni qo‘llab-quvvatlash davlat maqsadli jamg‘armasi qayta tashkil etildi.
Qiziqarli suhbat shaklida o‘tgan seminar davomida Jamiyat Boshqaruvi xodimalari mavzu yuzasidan o‘zlarini qiziqtirgan savollariga javoblar olishdi.
Axborot xizmati