«O'zagrosug'urta» aksiyadorlik jamiyati

“O‘zagrosug‘urta”: bajarilgan ishlar, kelgusidagi rejalar va soha yangiliklari yuzasidan ma’lumot berildi

2023-yil 16-noyabr kuni O‘zbekiston milliy matbuot markazida “O‘zagrosug‘urta” AJ tomonidan joriy yilning o‘tgan davri mobaynida amalga oshirilgan ishlar, kelgusidagi rejalar va sohadagi yangiliklar yuzasidan matbuot anjumani bo‘lib o‘tdi.

Bugungi kunda turli sohalarda amalga oshirilayotgan keng ko‘lamli islohotlar natijasida yurtimiz hayotida qator o‘zgarishlar ro‘y bermoqda. Bu o‘z navbatida sug‘urta xizmatlariga bo‘lgan ehtiyoj oshishini ta’minlab, sug‘urta bozorida sog‘lom raqobat muhitini yuzaga keltirmoqda.

Ta’kidlanganidek, 2023-yil “Insonga e’tibor va sifatli ta’lim yili”da o‘z oldiga belgilab olgan vazifalar bo‘yicha “O‘zagrosug‘urta” AJ aholi o‘rtasida sug‘urta xizmatlarining sifati va ko‘lamini oshirish, ularning yangi turlarini joriy qilishga alohida e’tibor qaratib kelmoqda. Belgilangan vazifalarning ijrosi Jamiyatning 2023-yil o‘tgan davridagi faoliyatida yaqqol namoyon bo‘ldi.

Barchamizga ma’lumki, milliy sug‘urta bozorining jadal rivojlanishini ta’minlash, iste’molchilarning sug‘urta bozoriga bo‘lgan ishonchini oshirish maqsadida Prezidentimizning 2021-yil 23-oktabrdagi “Sug‘urta bozorini raqamlashtirish va hayot sug‘urtasi sohasini rivojlantirish bo‘yicha qo‘shimcha chora-tadbirlar to‘g‘risida”gi Qarori tasdiqlangan bo‘lib, mazkur hujjatga ko‘ra, 2023-yil 1-yanvardan boshlab majburiy sug‘urtaning barcha turlari bo‘yicha sug‘urta polislarini qog‘oz blankalarda rasmiylashtirish amaliyoti bekor qilinishi belgilandi. Qarordagi mazkur topshiriq asosida joriy yil boshidan Kompaniya rasmiy sayti orqali majburiy sug‘urta turlarini onlayn rasmiylashtirish tizimi yo‘lga qo‘yildi.

“O‘zagrosug‘urta” AJ tomonidan zamonaviy to‘lov tizimlaridan foydalangan holda masofadan turib ya’ni, onlayn tarzda sug‘urta polislarini xarid qilish imkoniyatlari kengaytirib borilmoqda. Joriy yil boshida “O‘zagrosug‘urta” AJ mijozlar uchun “Onlayn polis” axborot tizimi orqali 18 turdagi onlayn sug‘urta xizmatlarini taqdim etgan bo‘lsa, hozirgi kunga kelib, 26 turdagi polislarni elektron shaklda (e-polis) sotib olish imkoniyati yaratildi. Kelgusida jismoniy va yuridik shaxslarga ko‘rsatiladigan barcha ommaviy sug‘urta xizmatlarini elektron shaklga o‘tkazish maqsad qilingan.

Shu o‘rinda mijozlarning kompaniya xizmatlaridan foydalanishga bo‘lgan qiziqishlarini oshirish, Jamiyatning sug‘urta bozoridagi ijobiy imidjini mustahkamlash, yangi mijozlarni jalb qilish, onlayn sug‘urta xizmatlarini ko‘paytirib borish, mavjud sug‘urta turlari haqidagi ma’lumotlarni keng tarqatish maqsadida ommaviy marketing tadbirlarini tashkil etib kelmoqda.

Xususan, 2023-yilning 1-oktabridan 2024-yil 1-fevralga qadar “Omadli sug‘urta” nomli aksiyasini o‘tkazmoqda. Kompaniyaning agros.uz rasmiy veb-sayti orqali onlayn yoki joylardagi markazlardan oflayn shaklda tegishli ixtiyoriy sug‘urta polislaridan birini xarid qilgan fuqarolar ushbu aksiyada qatnashib, qimmatbaho sovg’alarimizdan birini yutib olishlari mumkin bo‘ladi.

Mijozlarga polislarni nafaqat elektron sotish tizimida, balki kompaniya faoliyatini to‘liq raqamlashtirish borasida ham izchil ishlar olib borilmoqda. Xususan, “O‘zagrosug‘urta” aksiyadorlik jamiyati faoliyatini raqamlashtirishga mo‘ljallangan “Uzagros Online” yagona elektron axborot tizimi to‘liq modernizatsiya qilindi. Endilikda bu tizim orqali an’anaviy qog‘ozbozlikdan mutloqo voz kechiladi. Kompaniya va uning tizimidagi barcha turdagi hujjatlar aylanmasi aynan shu platformada aks etadi. Hozirda ushbu platforma imkoniyatlari, unda ish yuritish bo‘yicha respublika bo‘yicha kompaniya xodimlari uchun o‘quv-seminarlar tashkil etilmoqda.

Jamiyatning bugungi kunda respublikamiz bo‘ylab 14 ta filiali hamda jami 187 ta sug‘urta markazlari shahar va tumanlarda aholiga 150 dan ortiq sug‘urta xizmatlari taklif etilmoqda.

Jamiyat sug‘urta faoliyatini amalga oshirilishi natijasida joriy yilning o‘tgan 10 oyi mobaynida ta’minlangan sug‘urta mukofotlari 305,5 milliard so‘m bo‘lib, majburiy sug‘urta bo‘yicha 60,2 mlrd so‘m, ixtiyoriy sug‘urta turlari bo‘yicha 245,3 mlrd so‘mni tashkil qilmoqda. Bu o‘tgan yilning mos davriga nisbatan o‘sish 27,8 foiz yoki 66,5 mlrd so‘m ko‘p sug‘urta mukofotlari ta’minlandi.
Rasmiylashtirilgan sug‘urta shartnomalari bo‘yicha olingan majburiyat hajmi 159,9 trillion so‘mni tashkil qildi, bu esa o‘z navbatida o‘tgan yilga nisbatan 193,5 foizga ko‘p demakdir. Shu davr mobaynida Jamiyat mijozlari bilan jami 642 204 dona sug‘urta shartnomalari tuzilgan bo‘lib, shartnomalarning qariyb 91,4 foizi yoki 586 891 donasi mamlakatimiz aholisining sog‘lig‘i va mol-mulki uchun ko‘rsatilgan sug‘urta xizmatlariga to‘g‘ri keladi. Olingan majburiyatlar doirasida mijozlarimizni manfaatlarini himoya qilish maqsadida 43,4 mlrd. so‘mlik sug‘urta tovonlari to‘lab berildi. Bu o‘tgan yilning mos davriga nisbatan o‘sish 26,5 foizni yoki qariyb 9,1 mlrd so‘mni tashkil qiladi.

Jamiyatning O‘zbekiston sug‘urta bozorida yetakchi maqomiga erishishida xalqaro hamkorlikning, xususan qayta sug‘urta yo‘nalishidagi faoliyatning hissasi ulkandir.

Ma’lumki, “O‘zagrosug‘urta” AJ respublika sug‘urta bozorida xalqaro reytingga ega kam sonli kompaniyalardan biri bo‘lib, 2019-yildan buyon dunyoning yetakchi reyting agentligi hisoblanadigan “Fitch Ratings Cis Ltd” xalqaro reyting agentligi bilan hamkorlik aloqalarini o‘rnatib kelmoqda. Natijada, 2019-yildan e’tiboran ushbu xalqaro reyting agentligi tomonidan Jamiyatga “BB-” Barqaror reytingi berib kelinmoqda. Jumladan, 2023-yil iyul oyida mazkur xalqaro reyting yana bir bor qayta tasdiqlandi. Bu natija xalqaro investorlar va mahalliy aholining sug‘urta xizmatiga ishonchini yanada mustahkamlash uchun muhim indikator hisoblanib, Jamiyatning xalqaro qayta sug‘urta bozoriga chiqish imkoniyatini jadallashtirmoqda.

Jamiyat xalqaro qayta sug‘urta bozoriga faol kirib borishi natijasida jahonning yirik sug‘urta kompaniyalari va qayta sug‘urtalash brokerlari bilan qayta sug‘urta doirasida hamkorlik aloqalari yo‘lga qo‘yildi. Bugungi kunda Germaniyaning “Hannover Re”, Shveytsariyaning “Swiss Re” va “Europa Re” kabi qayta sug‘urta kompaniyalari, shuningdek, Buyuk Britaniya, Koreya, Turkiya, Latviya, Chexiya, Gruziya, Qozoqiston va Hindiston singari davlatlarning “Sonsilium Re”, “New Poin Insurance Brokers”, “TOO Marsh”, “Turker Sigorta ve Reasürans Brokerligi”, “AON”, “ENG Plus” kabi qayta sug‘urta brokerlari bilan hamkorlik qilinmoqda.

Bundan tashqari, “United Registrar of Systems” xalqaro sertifikatlashtirish uyushmasi tomonidan “O‘zagrosug‘urta” aksiyadorlik jamiyatiga sifat menejmenti tizimi sertifikati topshirildi. Bu bilan Jamiyat faoliyati ISO 9001:2015 xalqaro standarti talablariga muvofiqligi tasdiqlandi. Ushbu hujjat xalqaro maydonda Jamiyat hamda uning filiali tomonidan yuridik va jismoniy shaxslarga yuqori sifatli sug‘urta xizmatlarini ko‘rsatilib kelinayotgani tan olinganligini belgilaydi.

InsuResilience Solutions Fund (ISF) xalqaro jamg’armasi O‘zbekistonda bog‘dorchilik va sabzavotchilik mahsulotlarini yetishtirishda iqlim bilan bog‘liq xavf-xatarlardan himoya qilish bo‘yicha sug‘urta mahsulotlarini yaratish va joriy etishni moliyalashtiradi. Bog‘larni iqlim o‘zgarishi bilan bog‘liq xavf-xatar va tabiiy ofat oqibatlaridan himoya qilish maqsadida Sug‘urtani rivojlantirish forumining (IDF) ikki a’zosi hisoblangan dunyodagi yetakchi Europa Re va Swiss Re qayta sug‘urta kompaniyalari hamda ikkita mahalliy sug‘urta kompaniyalaridan biri bo‘lmish “O‘zagrosug‘urta” AJ bilan fermer xo‘jaliklari uchun qishloq xo‘jaligi sug‘urtasi mahsulotini ishlab chiqish ustida ishlamoqda. Ushbu loyihani dastlabki bosqichda Farg‘ona vodiysi hamda Samarqand viloyati hududlarida tatbiq etilishi rejalashtirilmoqda.